این وبلاگ هر روز با مطالب خواندنی آپدیت می شود -

بیایید سوم شهریور را بخاطر ایستادگی و شهادت سه سرباز سرافراز ایرانی ، در مقابل قوای تا بن دندان مسلح روس در سوم شهریور 1320 "روز جلفا " نام گذاری نماییم

۱۳۹۰ آبان ۱۶, دوشنبه

ساری کؤینک از یحیی شیدا

آي خسته قوش آواره گزيرسن بو دياري!
زنداندي قفسدي چمني باغي باهاري

گوزله اؤزیوي اووچي دير هرياني بو يوردون
قوزغون کيمي دورد گوزلو گزير کؤرپه شیکاري

فرصت داليسيجا گزيري ال يئري تاپسا
ويران قوياجاق يوردونو آي کؤينگي ساري!

تيک اؤز يوواني قويما سنه ال تاپا اووچي
سن بو يووانين صاحیبي سن،قان! يئنه باري

جهد ائيله کي جان قورتاراسان اووچي اليندن
دوشسن تورا فرياد ائله مه چک بو فشاري

گولشنده کي يوخ ذوق و صفا آي ساري کؤينک
قاچ ! قاچ ! بو يئرين زهريليدير داري نداري

ديلله نسن اگر اووچي ائدر قانينا غلتان
اوچسان آ يازيق! تير جفا قلبيني ياري

مين فيرتانا قالخيب دؤيه جک باشينا طوفان
هر کيمده اولا داغ کيمي دونيادا وقاري

گلسه باشيوا درد و بلا داغ کيمي دور باخ
آيديندي بو سؤز توستو گئده ر گؤيچه یه ساري

ايستر سني صياد اؤزونه رام ائـده آممـا
اويغو دا گؤره ر آج تويوق البته کي داري

بو ياخشي مثل دير کي بيزیم ائلده دئميشلر
بير باخ آشاغي باخما اوزوندن ده يوخاري

غم غصّه کيچيک قلبيني گر دؤيسه سيخيلما
بو گوند ه کئچر آخيري غملر ده قوتاري

اوندا کي چيخار گون ياييلار عالمه بيردن
اوندا کي قارا دان يئري صبح اولجاق آغاري

داغي داشي آسوده خياليله گزه رسن
گولشنده نه شاختا گوره سن داغدا نه قاري

ظولمون ائوي ويران اولو ظاليم دوشر الدن
قان دورماز اگر کسسه بيچاق قيرسا داماري

بختين قاپيسي ايندي قيفيللانسا داريخما!
هر بير قيفيلين واردي طبيعت ده آچاري

اؤز جانيويلن اویناما بو عرصه ده « شيدا »!
ليلاج دغلبازيله قيزديرما قوماري